Gizarte Zientzietan espezializatutako irakasle talde bat gara. Gaur ezagutzen dugun hezkuntzaz haratago begiratzea dugu gustoko eta egungo hezkuntzak dituen erronken inguruan hausnartzen gabiltza. Bidean gai desberdinak jorratzen ditugu: IKTak, guztiontzako eskola, kulturartekotasuna, inklusioa, ikerkuntza hezkuntzan, irakasle profila,...
Hartu parte gure ikuspegi berritzailean eta ezagut eta jarrai gaitzazu, helmuga baino bidean biziko ditugun abenturak aberasgarriagoak izango dira!
Dokumentalean
agertu diren migratzaile guztiek beraien jatorria non dagoen jakin arren
galdera horiek norbere "identitatearen gabezia” nabarmena islatzen dutela
pentsatzen dut. Herri nortasuna zalantzan jarri eta migratzaile identitateari
heldu diotela uste dut, "nomada identitatea”.
"La generación de los cuerpos partidos” moduan
ezagutu izan dira garai haietako Alemaniara joandako migratzaile gazteak.
Gorputza Alemanian eta burua Espainian zutela bizi ziren. Egoera hau aintzat
harturik ez nau batere harritzen norbere identitatearen gainean zalantzak sortzea,
identitate ukatu batzuekin bizi behar izatea eta migratzaile identitatea bere
egin behar izatea.
Bestalde,
dokumentalean emakume batek aipatzen duen "ley humana”k ere atentzio berezia
eman dit. Garaiko antolakuntza kolektiboetan parte hartzeko arrazoia zela zioen
berak. Eta gaur, gure herrietan bizi diren migratzaileei giza lege ikuspegi
horretatik begiratzen al diegu? Ez al dugu bestelako etiketa bereizgarriekin
"giza” izate hori estaltzen? Ez al dugu gure arteko ezberdintasun horiek
azpimarratu nahi izaten oinarrizko berdintasuna aintzat hartu beharrean?
Mundu mailako
merkatu bat eraikitzen gabiltzan bitartean, erabiltzen ditugun produktu guztiak
inolako harresirik gabe bidaiatzen duten bitartean, ikaragarrizko mugak ari
gara sortzen hiritarrentzako. Nortasun nazionala "absolutu” bilakatzen ari gara
eta, hori, areagotu egiten da krisi garaietan. Hiritarren artean mailaketak eta
pertsona ilegalak sortzen ditugu. Ez al da kontraesan bat?
Migrazioaren
ondorioz milaka pertsonek bizi duten egoera latzak geure parte moduan ulertu
behar ditugula pentsatzen dut. Migrazioak sortzen duen zapalketa, segregazio, umilazio,
bazterketa... guztiak ez dira herri edo pertsona migratzaileen arazo. Gizaki
garen heinean giza arazo dira eta, beraz, guztiok erantzukizuna izan behar dugu
oztopo guzti horiek gainditzeko.
Errealitate honen aurrean hezkuntza zeregin handia duela uste dut. Hainbatetan azpimarratu izan den eta dugu bezala, hezkuntza tranformazio sozialerako giltzarria da. Ekin diezaigun bada arazo global honi alternatiba lokala ematen gizarte osoaren eraldaketari bide emateko!
XXI.
mendeko ikastetxeek aniztasuna modu parekidean kudeatzea helburu izan behar
dute. Ikastetxeko pentsamendu, ohitura, balio, identitate… ezberdinak kontuan
izanik pertsonak elkarren artean errespetuz eta elkarlanez harremantzea izan
behar du meta. Ikastetxeak inguratzen duen gizarte, kultura eta ekonomia
kontuan izanik hezkuntza plan integrala gauzatu eta eskaini behar da.
Elkartasuna, beraz, ezinbesteko baldintza da komunitate zabalean ekiteko.
Inguratzen
gaituen gizartea aintzat hartuta ohartzen gara helburuak gauzatzea ez dela
batere erraza. Izan ere, gizarteko sistema guztia zapalkuntzan, mailaketan,
diskriminazioan oinarritzen dira. Genero zapalkuntzak, herrialde ezberdinen
arteko mailaketak eta, beraz, pertsonen arteko diskriminazioak ezaugarritzen
dute gaurko gizartea. Hala ere, oztopo guztiak mahai gainean ezarrita
ezinbestekotzat jotzen dugu gure komunitate txikitik hasita jendartearen
eraldaketarako apustu bat egitea.
Norberaren
banakotasun, berezitasunaren arabera, izaera desberdinak onartuz, genero-sexu
sistematik at egiten den pertsonen hezkuntza eskaintzea ezinbesteko da.
Irizpide sexistek, homofoboek, arrazistek, klasistek… barnebiltzen dituzten, gizon eta emakumeei
egokitutako rol, balore, portaerak transmititu gabe heztea izan behar du
erronka. Pertsona autonomoak izateko, gure bizitza proiektuen jabe izateko,
hurbileko inguruarekin elkarbizitzan, behar ditugun gaitasunak garatzea
ahalbidetzeko helburuekin. Hezkidetza kontzientea den prozesu hezitzailea izan
behar du eta neska eta mutilen arteko aukera berdintasunean oinarritzen da,
pertsonen garapen integrala lortu nahian.
Egun
gure herrian, eremu desberdinetan ematen diren eskubide urraketak identifikatu
eta pixkanaka gaindituko dituzten pertsona autonomoak eta osoak heztea da
helburua. Urratsez -urrats anitzagoa, parekideagoa eta osasuntsuagoa izango den
herria eraiki nahi dugu. Ikuspegi honetatik, edonolako eskubide urraketen
gainean eta sakoneko eraldaketa posible izateko lanean ari diren Euskal Herriko
eragile anitzekin elkarlana eta lankidetza behar beharrezko direla deritzogu.
XXI. mendeko hezkuntzaren ardatz nagusienetako bat irakaslearen etengabeko hausnarketa eta izaera kritikoa sustatzean datza. Irakaslearen jarduna etengabe berraztertzeko beharra dago, bere lana burutzen duen errealitatera moldatu eta honi ahalik eta era eraginkorrean erantzuteko. Jarraian ikusgai dagoen bideoak era argigarri batean azaltzen du ideia hauek.
Baina irakasleak bere burua eta jarduna aztertu eta hobetu behar duela esatea ongi dago, baina nola egin hau? Zein bidetatik? Aditu eta ikertzaile ugari saiatu dira galdera, baina guk arlo honetan, praktika gogoetatsua deritzona defendatzen dugu.
Praktika gogoetatsua
Izenburuak
dioen bezala, jarraian datozen lerroak, praktika-gogoetatsuaz arituko dira. Baina zer
da eta zertarako? Irakasle ikertzailearen lanerako ardatz nagusia praktika gogoetatsua deritzona da. Bere egunerokotasuna finkatuko duen oinarria izan behar delarik.
Jardun honen helburua, irakasleak euren
eguneroko jarduna era kritiko batean aztertuz (ekintzen ikerketa), beraien
ekina hobetuko dituzten berrikuntzak txertatzea da irakaskuntza prozesuan.
Horretarako, irakasleak ikerlari funtzioa izan behar du, hots, bere praktika
guztia aztertu behar du eta bertan aurkitzen dituen akats edota gabeziei
erantzun. Hau da, helburua ikasiz ikastea litzateke. Ondorioz, irakasleak
ikerlari bilakatuko dira, beraien eguneroko jardunean.
Hau guztia aurrera eramateko,
beharrezkoa da ikerkuntza prozesua edota praktika-gogoetatsua bideratuko duen
metodologia bat garatzea. Baina lehenik eta behin, beharrezkoa da metodologia
horrek izan behar dituen helburuak zehaztea. Metodologia hau, gai izan behar da
prozesua burutzen ari den pertsonak konpetentzia berriak barneratzeko, bere
aurreko jakituria eta praktikan oinarritzen direnak. Baina hauek ez dira
bakarka garatu beharrekoak, baizik eta ikastetxeko kideon arteko interakzio
sozialak garatuko dituen jakituriak
dira, azken finean prozesu hau praktika kolaboratibo bat izan behar delako.
Denon arteko ikerketa eta jakiturien interakzioaren ondorioak aberatsagoak
izango dira eta konpetentzia.
Ez da ahaztu behar ere, prozesu
guzti hau ziklikoa dela, hau da, ez duela amaierarik. Beraz, praktika hau gure
pedagogo bilakaera guztian garatu beharreko zerbait izan beharko litzateke. Praktika gogoetatsuaren azalpen
labur honen ostean, jarraitu beharreko metodologia azalduko dugu.
Horretarako hainbat teknika ezberdin daude, baina hemen azalduko
dena ALACT deiturikoa da, ingelesezko akronimoa, Ekin (action) - Egindakoa aztertu (looking back to the action) – Kontzientziatu
(awareness of essential aspects) – Ekintza alternatiboak eraiki (creating
alternative methods of action) – Entseatu (trial) pausoetarako. Prozesu
guzti hau, praktikaren obserbazioan oinarritzen da.
Korthagenek (2001) garatutako teknika hau, bost pausotan banatzen
da, eta ikerketa hau burutzeko behar ditugun datuak jasotzeko erabili ahal
diren tresnak ugariak dira (klaseak grabatzea, egunerokoak…), baina hemen
erabiliko dena egunerokoa izango da, irakasleak, klasean ematen dena idatziko du,
bere jardun praktikoaren nondik norakoak islatzeko helburuarekin.
Nahiz eta bost pauso diren zehaztu dugun, 0 pauso bat ere txertatu
dugu, prozesua garatu ahal izateko egoera bat sortzea helburu izango duena.
0.AURRELANKETA
Praktika-gogoetatsua hasi aurretik,
beharrezkoa da lehenik eta behin irakasleari oinarri teoriko eta praktiko
batzuk eskaintzea bere burua eta bere kideena aztertu ahal izateko, beraien
garapen profesionalaren ikuspuntutik. Gogoeta egiteko eta ikerketa-praktikak
burutzeko instrumentuak ere bereganatu behar dituzte, hauek denak beraien
arteko kolaborazioaren ikuspuntutik garatu beharko dituztenak.
Baina, hau guztia ezin da garatu
irakasleak berak aldaketaren beharra sentitzen ez badu, eta ikerketa bere lan
egiteko modua hobetzeko tresna gisa ulertzen ez badu, beraz ikuspuntu hau argi
duela ziurtatu behar da.
1.EKIN
Prozesuaren abiapuntua da.
Pertsonaren esperientzia eta ekintzak dira, era intuitibo eta inkontzientean
burutzen dituenak.
2.AZTERTU
Egindakoaren gainean ezartzen da
helburua atentzioa, kontzientziazio prozesu bati hasiera emanez.
Praktika-gogoetatsua garatzeko,
fase honetan irakasleak, eguneroko edota noten koaderno bat erabiliko du.
Bertan, irakasleak klasean egindakoaren gaineko gogoeta edota hausnarketa bat
burutu beharko du, berau, klase bakoitzaren ostean egitea komeniko litzateke
edota denbora tarte laburretan (pare bat aldiz astean).
Honen helburua, bere jardueran
ematen diren une edota gertaera nagusiak plasmatu beharko dira. Hauek bi
eratakoak izan daitezke, irakaskuntzarekin zerikusia dutenak (ikasgaiaren
gaineko metodologia egokia bai/ez, kontzeptuen barneratzea), edo ikasle zein irakaslearekin
erlazioa dutenak, hau da norbanakoaren edo kolektiboaren arlo psikologiko edo
sozialarekin erlazioa dutenak (jarrerak…)
3.KONTZIENTZIATU
Atzera botatako begiradaren
ostean, pertsonak bere praktikan burutu behar dituen aldaketez ohartzen hastea da
fase honen xedea.
Horretarako, egunerokoa hartu eta
atzera bota behar du begirada, horrela, bere bilakaeraren prozesua ikusi ahal
izango duelarik. Sumatuko du, arazo edo gatazka batzuk behin da berriz agertzen
direla, eta horien jatorri eta zergatiez ohartzen hasiko da. Fase honetan eta
datorrenean (Alternatibak erakin), irakasleek oinarri teoriko eta kontzeptualak barneratu beharko dituzte, bai arazoak era egoki batean identifikatzeko, baita
beraien alternatibak oinarri bat izan dezaten.
4.ALTERNATIBAK
ERAIKI
Behin bere praktikan aldatu behar
dituen alorrak argi dituela, era kontziente batean fazeta horiei alternatibak
aurkitu eta metodo berriak eraikitzen dira.
Horretarako, nahiz eta irakasleak
norbanako bezala burutu dezakeen hau, praktika kolaboratiboa lehenestea
litzateke egokiena. Gogoeta eta alternatibak, norberak burututakoak baino
aberatsagoak izango baitira beste kideekin elkarganatu ezkero.
Guzti hau egiteko, irakasleak
elkar batu eta hausnartu behar dute. Prozesu honetan, irakasle bakoitzak ondorioztatu
dituzten kontzeptuak plazaratuko dituzte eta denen arteko elkarlanaren
bitartez, aterabideak aurkitzeari ekingo diote.
Prozesu honek gune ezberdinak
izan ditzake:
·Materia bereko irakasleak: maiztasun nahiko handia izan beharko lukete
(hilabetean behin), beraien helburua, materia garatzeko egiten diren praktikak
egokia izatea litzateke.
·Kurtsoko irakasleak: kurtsoaren bilakaera
egokiaz arduratzea da helburua. Horretarako, kurtsoen faseen arabera biltzea
komeniko zen (hiruhilabetero, lauhilabetero)
·Ikastetxeko irakasleak: Ikastetxean, praktika
era egokian ematen dela eta berau ikuspuntu gogoetatsu batetik garatzen dela
arduratu behar dira. Horretarako kurtsoan behin batu.
5.ENTSEATU /
EKIN
Azken pausoa litzateke eta era
berean lehenengoa ere, behin zikloa amaituta, ziklo berri bati hasiera emango
baitzitzaion, metodo berriak aztertu eta ebaluatzeari ekingo baitzaio.
Egoera ideal batean, egokiena Praktika Gogoetatsu bat egitea
litzateke, Schonek adierazi zuen bezala. Izan ere, ikasketa prozesua, praktika
simulatzen duten proiektuak gauzatzean oinarritzen baita, tutore eta kideen
arteko interakzioan.
Ingurugiroarekiko eta norberarekiko ohitura desegokien zuzenketan
kontzientzia hartzea
Gizarteak, bizitzen ari den transformazio-prozesuan zehar hainbat
arazorekin topo egin du, besteak beste…
●Ekonomiaren garapenak bultzatutako
kontsumismoa eta honen ondoriozko ingurumenaren kutsadura.
●Teknologia berriek aisialdiaz
gozatzeko ekarri dituzten ohitura berriak, sedentarismoa eta obesitatea
bultzatuz.
●Euskal kulturan “ohikoa” den
alkoholaren kontsumoa, gazte gehiagoren artean droga honen kontsumoa bideratuz.
Gatazka hauei aurre egiteko jomugaz, berrikuntza
proiektu bat proposatzen dugu. Honela, ikasturtean zehar,
arestian azaldutako arazoak ardatz bezala harturik, hainbat ekintza burutuko
dira ikastolako partaide diren guztiekin (ikasle, irakasle, guraso…).
HELBURUAK.
Helburu nagusia ikasleen ingurugiroarekiko eta norberarekiko ohitura
desegokiak zuzentzea eta ideia hauetan kontzientzia hartu araztea da. Bereziki
puntu edo helburu hauetan sakonduko da proiektua:
·Planetaren egungo egoera dela eta,
gazteak kontzientziatu eta motibatu nahi ditugu inguru-giroaren alde jokatu
dezaten. Bizi garen gizarte kontsumista honetan egunero hainbat eta hainbat
zabor tona sortzen ditugu. Arazoa larria da eta zenbateko zabor hori gutxitzea
euren erantzukizuna da. Hortaz, murriztea, berrerabiltzea eta birziklatzea
ezinbestekoa dela ulertu behar dute, guztion etorkizuna haien eskuetan dago
eta.
·Bizimodu aktiboa sustatu nahi
dugu. Ikasleak euren egunerokoan ariketa fisikoa burutzeak duen garrantziaz
kontzientzia hartu. Heziketaren parte izan behar du kirolak ere, gorputzaren
hazkuntza prozesuan norberak bere gorputza kontzienteki mugitzen jakin dezan.
Kontzientziazio prozesu honetan ezinbestekoa da gurasoen parte hartzea.
·Alkohola eta orokorrean droga
kontsumitzeak sor ditzakeen arriskuen berri eman nahi diegu gazteei, beraien
kontzientzia piztu eta osasuna hobetzeko asmoz. Adingabeek alkohola
kontsumitzeak berehalako ondorioak izan ditzake, eta gainera, larriak, baita
ondorio kaltegarriak ere epe luzean, hala nola alkoholarekiko adikzio kronikoa.
Nerabeen garuna bereziki ahula da alkoholaren ondorioen aurrean. Azken urte
hauetan, azterlan zientifiko askok egiaztatu dute lotuta daudela nerabeen
alkohol kontsumoa eta kalte zerebrala. Beraz, egoera honen aurrean, gazteekin
gai hau sakonki lantzea ezinbestekotzat hartzen dugu.
JARDUERAK POSIBLEAK
Bigarren eskuko merkatua.
Helburua:
Erabiltzen ez diren gauzei bigarren aukera bat ematea, eta horrela
kontsumismoaren murrizketan laguntzea
Materiala birziklatzeko tailerra.
Helburua: Zabor
bihurtuko materialei erabilera ezberdina ematea.
Ginkana.
Helburua: Ikasleak
kirola egitea osasuntsu egoteko eta aldi berean naturaren aldeko ekintzak
aurrera eramatea.
Eskola kirolari buruzko hitzaldia.
Helburua:
Gaztetatik kirola egiteak ekartzen dituen onurez kontzientzia hartzea.
Ikastetxeen arteko Olimpiada.
Helburua: Kirola sustatuz,
taldelana, elkarrezagutza eta osasuna landu nahi dira.
Aldarrikapendun kamiseten egunak.
Helburua: Ingurugiroarekiko eta
norberarekiko ohitura txarrez kontu hartzea.
Drogen kontsumoaren inguruko hitzaldiak.
Helburua: Esku-hartze hauen helburua gazteak droga kontsumoarekin lotutako arriskuez jabetzea, kontsumo horrek eragin ditzakeen kalteei eta arriskuei buruzko informazioa izatea eta autozaintzako jokabideak indartzea da, droga kontsumitzea erabakitzen badute
Irakasleen prestakuntza iraunkorra alkoholaren
prebentzioaren inguruan.
Helburua:
Irakasleen prestakuntza honen helburua ikastetxeko irakasle eta
orientatzaileentzako formazioa eskaintzea da, ikasleentzako programak era
egokian gauzatzeko, baita eguneroko gatazka eta egoerak modu hezgarri eta
positiboan aurrera eramateko.
Hezkuntza gizarte
batean aurkitzen dugun tresna baliotsuenetako bat da. Gizartea eraldatzeko
tresna beharrezkoena eta eraginkorrena da berau. Bere potentziala aintzat
harturik gaur gure ikastetxeetan aurkitzen ditugun erronka nagusiez arituko
gara jarraian. Hezkuntza eskubidearen bermea, curriculum malguen beharra,
inklusioa, ikasketa prozesua eta irakasleen betebeharrez arituko gara.
HEZKUNTZA
ESKUBIDEA
Denboran zehar
bilakaera nabarmena eman du hezkuntzak eta baita berari hertsiki loturik
aurkitzen ditugun beste hainbat alorrek ere. Gizarteko eremu oro bezala garaian
garaiko pentsamendu eta ideiei egokitzen joan izan da hezkuntzaren esparrua,
pribilejio moduan hautematetik eskubide izatera pasa da eskola eremuko
hezkuntza.
Herri bateko
pertsona guztiek, pertsona izate hutsagatik, eskubide zibil, politiko eta
sozialen jabe dela ulertzen da gaur egun zenbait dokumentu idatzietan bai eta
hainbat diskurtso politikotan. Hala ere, errealitateak erakusten digu herritar
guztiek eskubide horietaz gozatu dezaten dokumentu eta diskurtsoez gain
baldintza material konkretuak beharrezko dituztela. Askotan ulertu izan da haur
eta gazteak hezkuntza zentroetara joateko aukera bermatua izate hutsagatik
hezkuntza eskubideaz gozatzeko baldintzak asebeteak zirela.
Hezkuntzaren
esparruko alor ezberdinetan lanean aritu izan diren profesionalek, berriz,
azpimarratu dute hezkuntza eskubidearen eremua ikastetxeetara joateko aukeraz
haratago ulertu behar dela. Pertsona orok bere garapen pertsonal, kognitibo,
emozional… behar bezala garatu ditzan ezinbesteko da ikastetxeetara joateko
aukeraz gain ikaste prozesu guztian zehar izango dituen baldintzak aztertu eta
horien berme zuzena ahalbidetzea.
Ikaste prozesua
integrala izan dadin beharrezko izango da pertsona bakoitzaren garapena modu
autonomoan landu eta aztertzea. Herritar orok dituen baldintzak, testuingurua,
ezaugarriak… aztertu beharra dago eta horien araberako hezkuntza proposamen
integral bat ahalbideratu behar da. Modu honetan, eta soilik honetan, bermatu
ahal izango dugu herritar ororen hezkuntza eskubidea.
Ulertu behar dugu pertsona bakoitzaren bizi baldintzak
eta garapena oso ezberdinak direla, pertsonen izatea oso anitza dela eta,
beraz, guztiek hezkuntza eskubidea bermatu izan dezaten prozesua modu
ezberdinetan eta denbora ezberdinetan planteatzea ezinbesteko izango dela.
Hezkuntza eskubidearen bermea ez da soilik norbere
garapen pertsonala bermatzeko baldintza soilik. Eskubide honek herritarren
garapena bermatzeaz gain herri eta gizartearen garapenerako ezinbesteko
baldintza dugu. Hezkuntzaren bitartez nahi eta behar bezalako herritarrak
heziko ditugu. Herri baten hazkuntza honek beronen gainean izango duen
inplikazio mailaren arabera emango da eta, arrazoi hori medio, esparru horretan
apustu garbi bat egitea ezinbesteko izango dugu.
CURRICULUMA
Orain artean pertsona bakoitzak duen hezkuntza
eskubideaz eta honek herri bateri ematen dion aberastasunaz mintzo gara.
Esandako guzti hori garatzea posible izan dadin ezinbesteko izango da
Curriculumaren esparruko azterketa eta eraldaketak ere planteatzea.
Curriculumak herrian herriko
errealitateari erantzun beharko dio. Honen historia, testuingurua, baldintzak,
balioak … aintzat harturik diseinu orokor bat egin beharko da. Baina
orokortasun hori ikasle bakoitzaren errealitate, baldintza eta ezaugarrietara
moldatzea ere ezinbesteko izango da norbanakoaren behar bakoitzari erantzunez
hezkuntza eskubidea gauzatua izan dadin.
Jakin badakigu pertsona
bakoitzak dituen gaitasunak eta beharrak oso ezberdinak direla. Hezkuntzak,
azpimarratzen gatozen bezala, norbere beharrei erantzun beharko die hezkuntza
eskubideaz pertsona orok goza dezan. Hori
dela eta Curriculuma ezin izango da bat eta bakarra izan, norbanako bakoitzaren
prozesuari egokitu beharko zaio. Modu honetan, helburuak guztientzako berdinak
izanik ere bakoitzak garatuko duen prozesua oso bestelakoa izango da bai
erabiliko den metodologian, bai denboretan, bai baliabideetan, bai espazioetan
ere. Curriculumaren planteamendu hau gauzatu ahal izateko, baina, ezinbesteko
izango da hezkuntza komunitateko kide eta instituzio guztien inplikazio eta
elkarlan sendoa. Curriculumaren egokitzapenak hainbat alorretan eraldaketak
egitea inplikatzen du. Honela, eskolak integratzaile izatetik inklusibo izatera
pasa beharko dira, metodologian berrikuntzak eta egokitzapenak egin beharko
dira etengabe, elkarlan indartsua bermatu beharko da hezkuntza komunitate guztiaren
aldetik, hezkuntza alorreko profesionalek erronka berriei erantzun beharko die
eta, beraz, etengabeko formakuntzan jardungo dute, hezkuntza legediak baldintza
guzti hauek gauzatzea ahalbidetu beharko du …
ESKOLA INKLUSIBOA
Curriculum orokorraren egokitzapenak ikasle
bakoitzaren beharrei erreparatzea ekarriko du eta, modu horretan, ikasleen
artean aurkitzen ditugun ezberdintasun anitzak azaleratuko dira. Aniztasun
horiek eremu askotan antzemango ditugu: eguneroko bizi baldintzetan,
gaitasunetan, beharretan, izaeran …
Aniztasuna, orain artean, oztopo moduan ulertu izan
da. Gehiengoaren patroietatik at zeuden pertsona guztiak seinalatu, etiketatu
eta baztertu egin izan dira orain artean. Ikuspegi hau, pertsona eta herri
bezala, ezinbestez aldatu behar dugu. Aniztasuna aberastasun iturri moduan
ulertu behar dugu.
Pertsona guztiok gara gure artean ezberdin. Ez dugu
aurkituko inor bata bestearen berdina denik. Aniztasun horri aurre eginez gure
errealitatea moldatu behar dugu, baita gure eskolak ere. Aniztasuna
aberastasuna izanik gure gelak heterogeneoak izatea bultzatu eta aniztasun hori
ezagutza lortzeko bitarteko moduan ulertu behar dugu, horretarako norbere
berezitasunen aitortza egin beharko da.
Aniztasunaren ikuspegi zabal hori gure ikasgeletara eraman
behar dugu baina inklusio prozesu hori emateko behar beharrezkoa izango dugu
komunitate sentimendua izatea eta bertan elkarbizitza osasuntsu bat gauzatzea.
Hala ere, inklusioa bizi estilo moduan aplikatu ahal izateko gizarteko eremu
anitz ditugu oraindik eraldatzeko: kultura, politika …eta milaka dira eskola
eremuan ere gestionatu beharreko alorrak: curriculuma, metodologiak, ebaluazio
sistema …
Hezkuntza eskubidea bermatua izateko pertsona guztiak
beraien ikasgeletan eta herrian onartuak izan behar dira, bestela beraien
ikasketa prozesurako eta, beraz, hezkuntza eskubidea bermatua izateko
ezinbesteko baldintzak urratuak izango ditu. Ikasketa prozesuan ikasle
bakoitzaren behar eta gaitasunak antzemanez curriculuma egokitu egin beharko
da.
Curriculum malgu bat osatu behar da baina horretarako
beharrezko izango du ikastetxean malgutasun batez gozatzea. Hori dela eta
Euskal Herrian bizi dugun egoera zentralizatzailea gainditu beharra dugu.
Curriculum malguak ikastetxetako autonomia garatzea ekartzen du. Izan ere,
ikastetxeek beraien ikasleetan jarri beharko dute fokua, egunean bizi duten
errealitate zehatzari egin beharko diote aurre. Modu honetan ordutegi
aldaketak, espazio anitzak, elkarlana, baliabideak… moldatzen joan beharko
dira. Aurrera pausu hori ematea ezinbesteko baldintza izango da inklusioa
eskoletan bermatzeko.
Eskoletan orain arteko garapena egitea bermatzen
baldin bada, gu bizi garen errealitatea, gizartea inklusioaren bidean
eraldatzera ere bultzatuko dugu. Aurreko ataletan azaldu dugun bezala
hezkuntzak gizarteko herritarrak eraikitzen ditu eta, beraz, hezkuntza balore,
ideia aldaketak ematen baldin badira ezinbestez gizartea berau eraldatuko dugu.
Inklusioaren bitartez, beraz, elkarlana, aniztasuna, errespetua, autonomia …
baloratuak eta indartuak izango diren gizarte bat eraikitzeko bultza bat egingo
dugu.
IKASLEEN BEHARRAK HEZKUNTZA FOKU
Hezkuntza eskubidearen subjektu ikasleak dira eta,
beraz, hezkuntzak ikasle horien gainean ezarri behar du fokua. Ikasle guztien
aniztasuna erreparatuz curriculum malguak sortuz inklusioa ahalbideratzea
izango da ikastetxeek gaur izango duten erronka nagusietako bat.
Ikastea bizi guztiko prozesu bat moduan ulertu behar dugu
eta prozesu horrek ibilbide ezberdin asko izan ditzake. Ikasleen
testuinguruaren eta beharren arabera prozesua modu ezberdinetan diseinatu
beharko da.
Ikasketen helburua ez da soilik edukiak ezagutzea,
hots, adimen kognitiboa garatzea. Hezkuntza prozesuaren bitartez ahalik eta
garapen integralena lortu behar dugu eta, beraz, pertsonarteko adimena,
hizkuntza adimena, adimen logiko matematikoa, adimen espaziala, adimen
musikala, zinetiko-korporala, naturalistikoa eta kognitiboa landu beharko dira.
Gaitasun guzti horietan aurrera pausuak izateko
elkarren arteko kolaborazioan lan egiten ikasi beharko dute ikasleek, lan
autonomoan trebatu beharko dute, sormena landu beharko dute, kritikotasuna
garatu beharko dute … Hots, eskolak herritar arduratsu eta askeak garatu
beharko ditu, komunitatearekiko ardura eta konpromisoa erakusten dutenak, parte
hartze aktiboa gauzatu dutenak.
Ikasle, pertsona bakoitzak erraztasun eta zailtasunak
eremu ezberdinetan aurkituko ditu prozesuan zehar eta, arrazoi horregatik,
pertsonalizatua izango duen hezkuntza bat jasotzea ezinbesteko izango da berau
ikasle bakoitzarentzako ahalik eta aberatsena izan dadin.
IRAKASLEA
Hezkuntza eskubidearen bermea gauzatzeko, curriculum
malguak sortzeko, inklusioa gauzatzeko, ikasleen prozesu integrala bermatzeko…
gizarteko alor ezberdinetako profesionalen inplikazioa eta hezkuntza
komunitateko kidego guztiaren elkarlana beharrezkoa izango bada ere irakasleak
betetzen duen papera oinarrizkoa izango da.
Ikaslearen gaitasun eta beharretan fokua ezarriz bere
egin beharra horien ikasketa prozesua bermatzea izango da. Horretarako etengabe
formatzen jardun beharko du metodologia berrietan, teknologia berrien
erabilpenean … baina horretaz gain ikuspegi inklusiboa eta balore zehatz batzuk
izatea ere garrantzizko izango ditu.
Irakasleak lan egingo duen ikasleen egoera ulertzeko
eta egoera ezberdinak ahalik eta hobekien kudeatzeko ezinbestez adimen
emozionala landu beharko du. Ikasleak asertibitate osoz tratatu eta beraien
aukeraketetan bidelagun izan beharko du.
Irakasleak elkarlanari garrantzia handia eman beharko
dio eta kooperazio lanetan jarduten erakutsi beharko die ikasleei eta modu
horretan lan egitearen garrantzia azpimarratu beharko du.
Kooperazio horretan bakoitzaren ezaugarri ezberdinak
errespetatzen erakutsi beharko du irakasleak eta horretarako ezinbesteko izango
du norbanako bakoitzaren identitate indibidualaren alderdi positiboak
azpimarratzea, hau da, identitate positiboak eraiki beharko ditu.
Ikasle bakoitzak bere nortasuna onartua dela sentitzea
oso garrantzitsua izango da bere auto-kontzeptua eta auto-estimua garatzeko.
Horretarako behar beharrezkoa izango da irakaslegoak ikasleen etiketajerik ez
egitea eta bakoitzaren ikasketa prozesua bultzatzea. Izan ere, aurreiritzi ezkorrek
ikaragarrizko eragina izaten dute ikaslearen auto-kontzeptuan eta auto-estimuan
eta horrek ikaragarrizko eragina izaten du ikasketa prozesu osoan zehar.
Beraz, irakasleak edukiak erakusteko betebeharra
izateaz gain ikasle bakoitzak bere garapenean aurkituko dituen eraldaketa
(gorputz, adimen, sentipen, akademiko, pertsonal, profesional…) guztiei modu
egokienean aurre egiten lagundu eta irakatsi behar dio.
Irakaslearen betebeharra izango da, beraz, ikasle
bakoitzaren eta ikasle taldearen ongizatea bermatzea. Horretarako errespetuak
oinarritutako giro bat sortu beharko du bere ikasgelan.
Irakasleak
ardura oso garrantzitsua du beraz. Irakasleak herritarrak hezten ditu eta
herritar horiek arduratsuak, askeak, kritikoak, autonomoak, elkarlana oinarri
dutenak, aktiboak … izateko irakasleak ere balore horiek bere bere eginak izan
beharko lituzke ondoren ikasleei horiek garatzen laguntzeko.